एक नेपाली कम्पनीले चिनियाँ कम्पनीविरुद्ध आर्थिक अनियमितता गरेको भन्दै उजुरी दर्ता गरेको छ। विराटनगरमा रहेको आरती स्ट्रिप्स प्राइभेट लिमिटेडले चिनियाँ कम्पनी वुटाई स्टिलविरुद्ध उजुरी दर्ता गरेको हो।

आरती स्ट्रिप्सले वुटाई स्टिलबाट ७ सय मेट्रिक टन स्टिल उत्पादनका लागि अर्डर गरेको थियो। त्यसका लागि आरती स्ट्रिप्सले अग्रिम भुक्तानीसमेत गरेको थियो। तर लामो समय वितिसक्दासमेत वुटाई स्टिलले न अर्डर दिएको छ, न भुक्तानी फिर्ता दिएको छ। आरती स्ट्रिप्सले चिनियाँ कम्पनी वुटाई स्टिललाई पटक-पटक अर्डर वा भुक्तानी फिर्ता गर्न स्मरण गराउँदै आएको छ। जतिपटक ताकेता गरे पनि चिनियाँ कम्पनी वुटाई स्टिलले विभिन्न बहाना बनाउँदै आएको आरती स्ट्रिप्सले जनाएको छ।

यस विषयमा बेइजिङस्थित नेपाली दूतावासले पनि आफ्ना समकक्षीसँग पटक-पटक समन्वयका लागि अनुरोध गरेको छ। तर, चिनियाँ पक्षबाट सन्तोषजनक जवाफ नआएको आरती स्ट्रिप्सले जनाएको छ। पटक पटक धोका दिएकै कारण आफूहरूले वुटाई स्टिलविरुद्ध कानुनी कारबाहीमा जानुपरेको आरती स्ट्रिप्सले जानकारी दिएको छ।

वुटाई स्टिलले अर्डर पूरा गर्न नसक्नुको कारण आन्तरिक समस्या भएको छ। उसले आन्तरिक समस्याकै कारण आरती स्ट्रिप्ससँग गरिएको सम्झौताको दायित्व पूरा गर्न नसकेको बताएको छ।

पछिल्लो समय नेपाली व्यवसायीहरू चिनियाँ कम्पनीबाट ठगिदै आएका छन्। चीनबाट कपडा, जुत्ता, खेलौनालगायतका वस्तु आयातमा संलग्न भई चिनियाँ कम्पनीले नेपाली व्यवसायीलाई ठग्दै आएको छ। नेपाली व्यवसायीहरूको गुनासो पनि काठमाडौंस्थित चिनियाँ दूतावासले खारेज गरेको छ भने बेइजिङस्थित नेपाली दूतावास पनि नेपाली व्यवसायीलाई सहयोग गर्न कमजोर देखिएको छ।