सत्ता गठबन्धन भत्काउने माओवादीको तयारी
![सत्ता गठबन्धन भत्काउने माओवादीको तयारी](https://www.tharuwan.com/wp-content/uploads/2021/08/Prachanda1.jpg)
नेकपा माओवादी केन्द्रका अध्यक्ष पुष्पकमल दाहाल प्रचण्डले २०७४ सालमा कांग्रेससँग गठबन्धन सरकार बनाएर एमालेसँग एकता गरेका थिए। कांग्रेस सभापति शेरबहादुर देउवालाई सुइकोसमेत नदिई प्रचण्डले एमालेसँग एकता गरेर धोका दिएका थिए । अहिले तीनै तहको चुनाव आउँदै गर्दा देउवा प्रधानमन्त्री छन् । प्रचण्डले कांग्रेससँग गठबन्धन गरेका छन्।
भन्न त प्रचण्डले चुनावसम्मै गठबन्धन कायम हुनुपर्ने भनिरहेका छन् । तर अस्थिर तथा जता फाइदा त्यतै दौडिने स्वभावका प्रचण्डको भर छैन । फेरि धोका हुनसक्नेतर्फ कांग्रेसकै नेता सचेत छन्। यस्तो अवस्थामा प्रचण्डका एकजना विश्वासपात्रले भने गठबन्धन भत्किन सक्ने आशयको प्रतिक्रिया दिएका छन् । २०७४ को घटनाक्रम दोहोर्याउने गरी फेरि धोका दिने रणनीतिमा माओवादी अगाडि बढेको बुझ्न सकिन्छ । त्यसो त कांग्रेस एक्लै चुनाव लड्न चाहन्छ । तर गठबन्धन तोडेर प्रचण्डजस्तो विश्वासघात गरिहाल्ने पक्षमा कांग्रेस छैन ।
तर माओवादी भने पुरानै खेल दोहोर्याउने स्थितिमा पुगेको नेताहरुको अभिव्यक्तिले देखाएको छ । प्रचण्डनिकट वाईसीएलका पूर्वअध्यक्ष रामप्रसाद सापकोटा ‘दिपशिखा’ले गठबन्धन सहायक भएको उल्लेख गरेका छन् । माओवादी गठबन्धनको भर पर्न नहुने उनको तर्क छ । माओवादी आफै अग्रसर हुनुपर्ने उनले उल्लेख गरेका छन् ।
उनले भनेका छन्, ‘गठबन्धन सहायक पक्ष हो, सकेसम्म चुनावसम्म लैजानुपर्छ तर गठबन्धनकै भर पर्नु हुँदैन । हामी माओवादीले हाम्रै जमिनमा आफ्नै खुट्टाको तागतमा उभिनुपर्छ ।’ प्रचण्डका निकट व्यक्तिको आशयले माओवादी नै गठबन्धनको भारी बोक्न नचाहेको पुष्टि हुन्छ । अर्थात भ्याएसम्म कांग्रेसलाई प्रयोग गर्ने र अनुकूल भएपछि फेरि धोका दिने रणनीति देखिन्छ ।
Facebook Comment