खिचरा महोत्सवमा आज छेवाङ लामासँगै दर्जनौं प्रस्तुति हुने

आठौँ खिचरा महोत्सवअन्तर्गतको सांस्कृतिक कार्यक्रममा हाज नेपाली संगीत क्षेत्रमा स्थापित गायक छेवाङ लामाले प्रस्तुति दिने भएका छन्। ‘इशाराले बोलाउथिन्’, ‘आउँदैछु हेर तिमीलाई लिन’, ‘तिमी पारी म छु वारि’, ‘जातै सानो भयो’लगायत अन्य थुप्रै गीतहरु गाएका छन्।

अर्का चर्चित गायक अमितसिंह चौधरीले समेत कार्यक्रममा प्रस्तुति दिनेछन्। नेपाली गीतसहित थारु भाषाका गीतमा पनि उत्तिकै जम्न सफल भएका गायक चौधरीको ‘कति निश्चल कति चन्चल’, ‘तोर कुर्थावाक ललकि सलवा’, ‘क का कि कि’लगायत थुप्रै गीत चर्चित छन्। ख्यातिप्राप्त कलाकारहरूका साथै स्थानीय कलाकारहरुबाट समेत विभिन्न खालका कार्यक्रम हुने आयोजकले जनाएको छ।

यसका साथै विद्यालयस्तरीय ‘खिचरा डान्स आइडल’को अडिसनबाट छनौट भएका २५ जना विद्यार्थीहरुको प्रस्तुति रहने महोत्सवको नृत्य समिति संयोजक हरिशरण चौधरीले जानकारी दिए। विद्यालय उमेरका बालबालिकाको प्रतिभालाई सम्मानस्वरुप विद्यालयस्तरीय खिचरा डान्स आइडल आयोजना गरिएको उनले बताए।

खिचरा डान्स आइडलमा प्रथम हुनेले नगद ३० हजार र प्रमाणपत्र प्राप्त गर्नेछन्। दोश्रो हुनेले नगद २० हजारसहित प्रमाणपत्र पाउने छन् भने तेस्रो हुनेले नगद १० हजार र प्रमाणपत्र प्राप्त गर्नेछन्।

पेहनी होड पनि आजै
थारु भाषा साहित्यको संरक्षण गर्ने उद्देश्यले खिचरा महोत्सवको तेस्रो दिनमा ‘पेहनी होड’ (हाजिरीजवाफ) प्रतियोगिता गर्न लागेको आयोजकले जनाएको छ। यसका आलवा महोत्सवमा जारी जिल्लास्तरीय भलिबल तथा सितोरियो कराँतेको फाइनल खेल पनि आजै हुँदैछ।

पूर्वी चितवनको खैरहनी–५ जबकौली, दुर्गा मन्दिर परिसरमा यही पुस २८ गतेदेखि शुरु भएको महोत्सव माघ ४ गतेसम्म सञ्चालन हुनेछ।




Leave a Reply

Your email address will not be published.